Í vikuni skrivaðu MBM og Frælsur Ítróttur Føroya undir nýggja avtalu, sum hevur við sær, at MBM heldur fram sum høvuðsstuðul hjá Frælsum Ítrótti Føroya árini 2026-2028.
Samstarvið er upplagt millum hesar báðar partarnar, sum hava heilsufremjan og ein sunnan lívsstíl sum felags áhugamál.
Við avtaluni verða lunnar lagdir undir arbeiðið innan frælsa ítróttin komandi árini. Og júst komandi trý árini vera nøkur av teimum mest spennandi og avbjóðandi fyri frælsa ítróttin. Oyggjaleikir vera í Føroyum í 2027, og frælsur ítróttur er vanliga tann ítróttagreinin, ið hevur flestar áskoðarar á oyggjaleikunum. Umframt stóra fyriskipanarliga fyrirekingararbeiðið, ið skal gerast, er spenningur eisini um ítróttarligu úrslitini, sum hava verið so sera góð seinastu leikirnar.
Frælsur ítróttur Føroya hevur 7 limafeløg kring landið, sum sjálvstøðugt og í samstarvi við sersambandið skipa fyri eini 30 tiltøkum um árið – á breyt, á vegi, í lendisrenning og á alskyns teinum. Persónlig menning, vælvera og sosial samvera eru grundsúlur í hesi fjølbroyttu ítróttagrein, har til ber at menna seg alt lívið, uttan mun til, nær og á hvørjum støði byrjað verður.
Við avtaluni leggur MBM navn til vetrarkappingina í renning, stórkappingarnar á breyt og avbjóðingina at koma á mál í øllum teimum føroysku hálvmarathonkappingunum í sama ári.
Tony Weyhe, stjóri hjá MBM, og Gunnvá Wardum, forkvinna hjá Frælsum Ítrótti Føroya, skrivaðu undir nýggju avtaluna, og tey gleða seg til samstarvið komandi trý árini.
