Tey eru mong, sum hava runnið sínar allarskjótastu tíðir á 10 km í Runavík – á rutuni, sum fer runt Heiðaveg og Gulasteinsveg. Hendan leiðin verður vanliga runnin undir seinasta umfari av MBM vetrarkappingini, sum samstundis er FM í 10 km. Rutan er tiltikin skjót.
Fyri at met og tíðir skulu kunna góðkennast í altjóða høpi, má rutan verða uppmáld og góðkend eftir serligum reglum.
Fyrr í oktober-mánaði var ein góðkendur rutuuppmátari í Føroyum og helt skeið í uppmáting, og mátaði hann tá eisini 10 km rutuna í Runavík av nýggjum.
Síðani eru boð komin um, at rutan nú hevur altjóða góðkenning komandi 5 árini, fram til árslok 2030.
Næsta høvið at royna hesa skjótu rutu verður undir seinasta umfari av MBM Vetrarkappingini í Runavík leygardagin 21. mars 2026.
You must be logged in to post a comment.