Tað var av allarbestu líkindum – kalt og stilt, tá triðja umfar av MBM Vetrarkappingini varð runnið á Toftum leygardagin 22. november. Heili 63 rennarar – 16 kvinnur og 47 menn – høvdu leitið sær inn á Skálafjørðin. Teinurin var kendi og siðbundni teinurin Runt Agn. Byrjað varð við Tofta skúla. Runnið var úteftir niðan á Agnið, síðan framvið Toftavatni oman til Runavíkar og eftir ovara vegnum í Rókini og so eftir niðara veg út á málið, sum er við kommunuskrivstovuna á Toftum.
Góðu líkindini og høga støðið á luttakarum hevði við sær nógvar sera góðar tíðir. Hjá monnum vann Julian Gregersen, Treysti, við 33,29 min – so skjótt hevur ongin runnið hendan teinin áður. Rógvi Kárason, Bragdið, gjørdist nummar tvey við 35,23 min. og Oliver Granhøj, Bragdið, gjørdist nummar trý viå 36,21 min.
Hjá kvinnum vann Bjørk Herup Olsen við 43,05 min., frammanfyri Mariu Chun Nielsdóttir, 45,18 min., og Ann-Mari av Skarði, 45,37 min. Tær umboða allar Bragdið.
Hjá monnum var hetta triðji ymiski vinnari í trimum MBM vetrarkappingum, so tað boðar frá góðum í mun til samlaðu kappingina. Og hjá kvinnum vann Bjørk hesaferð ruddiliga á Mariu, sum annars hevur vunnið tvey tey fyrstu umførini. Kappingin telur íalt 8 umfør og endar við FM á 10 km í Runavík leygardagin 21. mars.
Nú er friður av MBM Vetrarkappingini restina av hesum árinum. 4. umfar verður runnið 17. januar 2026, tá Bragdið bjóðar til Kollafjarðar.
Tað eru tó góðar grundir til at renna nakrar langar túrar um jólini, tí longu leygardagin 3. januar bjóðar Roysnið til Skechers Performance Nýggjárshálvmarathon á Skálafjørðinum, sum eisini er fyrsta hálvmarathon-kappingin í avbjóðingini at renna seks hálvmarathon í 2026.
Úrslitini og myndir av vinnarunum í ymsu bólkunum síggjast niðanfyri. (Vinnaramyndir: Bragdið)
Sí øll úrslitini frá MBM VK3 Runt Agn her.
Fleiri myndir frá kappingini eru at síggja á Facebook-bólkinum hjá Roysninum her. og á Facebook-vanganum hjá Bragdinum her.
You must be logged in to post a comment.