Danska meistaraheitið í innandura frælsum ítrótti varð hildið í Odense um vikuskiftið. Maria Biskopstø úr Treystinum luttók í bæði 400 m og 800 m. Leygardagin rann hon 400 m, og í einari sterkari kapping betraði hon um føroyska metið, tá hon kom á mál við tíðini 56,96 sek. Hetta rakk til eitt sætta pláss í danska meistaraheitinum.
Í dag stóð Maria aftur á startlinjuni, hesa ferð til 800 m. Aftur her megnaði hon at seta føroyskt met og kom á mál við tíðini 2:11,14, sum eisini rakk til eitt triðja pláss í danska meistaraheitinum.
Maria hevur havt eitt sera gótt innandura kappingarár, har hon hevur sett fleiri føroysk met.
Hon byrjaði árið í Skive tann 17. januar, har hon rann 800 m við tíðini 2:15,18. Føroyska metið tá var 2:12,95. Síðani rann Maria í Pallas Speelen í Malmö tann 25. januar. Har rann hon bæði 400 m og 800 m og endaði við at seta nýtt føroyskt met á 400 m við tíðini 56,97. Hon betraði eisini um sína 800 metra tíð, sum gjørdist 2:13,87. Framgongdin helt fram, tá hon luttók í Nordenkampen í Karlstad 1. februar, har hon setti nýtt føroyskt met á 800 m við tíðini 2:12,61.
Maria hevur nú enn einaferð betra um føroysku metinini á bæði 400 m og 800 m. Vit ynskja Mariu hjartaliga tillukku við flottu úrslitunum.
Kelda: treysti.fo/Rutt Hjelm Gregersen
