At Bjørk Herup Olsen er í góðum formi fyri tíðina, munnu flestu renniáhugað hava fatað eftirhondini. Tí tað fer næstan ikki vikuskifti fram við, uttan at okkurt met er fallið fyri hennara hond.
Leygardagin var hon við í kapping í Princeton, New Jersey, nevnd Larry Ellis Memorial, har hon rann 5.000 metrar. Fyrr í ár hevur Bjørk runnið 17.12 min innandura, og Bjørk hevði sett nøsina upp móti at koma enn longur niður. Hetta eydnaðist tó ikki, men kortini gjørdist úrslitið so gott, at tað rakk til nýtt føroyskt met við trimum sekundum. Gamla metið átti hon sjálv, og var tá frá oyggjaleikunum seinasta summar, tá hon rann 17.40 min. Tíðin leygardagin og nýggja metið er nú 17.37,04!
FÍF ynskir Bjørk tillukku við metinum.
