Føroysku frælsítróttarfólkini stóðu seg sera væl á danska meistaraheitinum, sum varð hildið 25. og 26. juli. Fýra føroysk ítróttarfólk luttóku og vunnu tilsamans tvey silvurheiðursmerki og eitt bronsuheiðursmerki. Harumframt vórðu tvey føroysk met sett.
Størsta einstaka avrikið átti Maria Biskopstø, sum setti føroyskt met í tveimum greinum. Leygardagin rann hon 400 metrar á 56,94 sekundum og gjørdist sostatt fyrsta føroyska kvinnan, ið hevur runnið teinin undir 57 sekund.
Sunnudagin vann Maria silvur á 400 metra rimarenning. Tíðin var 1.00,35, og við henni betraði hon sítt egna føroyska met á 1.00,56, sum hon setti fyrr í ár.
Julian Gregersen tryggjaði Føroyum hitt silvurheiðursmerkið. Hann rann 3.000 metra forðarenning á 9.10,61 og var bert fá sekund frá føroyska metinum. Avrikið vísir, at Julian hevur góðar førleikar í tekniskt krevjandi greinini, har ferð, úthaldni og góður teknikkur skulu ganga hond í hond.
Rutt Gregersen vann bronsu á 5.000 metrum. Hon rann eina væl disponeraða kapping og kom á mál við tíðini 17.58,30, sum samstundis er nýtt persónligt met.
Oddvør Josephsen kappaðist á bæði 100 og 200 metrum. Hon rann 100 metrar á 12,56 sekundum og 200 metrar á 25,96 sekundum. Báðar tíðirnar eru hennara bestu í ár.
Við tveimum silvurheiðursmerkjum, einari bronsu, tveimum føroyskum metum, einum persónligum meti og tveimum ársbestu tíðum gjørdist talan um eitt framúr gott DM-vikuskifti hjá føroyskum frælsum ítrótti.
Úrslitini vísa samstundis breiddina í føroysku luttøkuni – frá sprinti og rimarenning til langteinarenning og forðarenning.
Øll úrslitini síggjast á iMARS.
