Tilmelding á staðnum!
Hálvmarathon í Havn 3. mei
Nú verður høvi hjá rennarum at royna seg á einum av teimun longru teinunum, tá Ítróttarfelagið Bragdið skipar fyri kapping í Hálvmarathon leygardagin 3. mei. kl. 14.00. Teinurin, sum er 21,1 km langur, byrjar og endar á Bursatanga.
Umframt, at renningin leygardagin er FM, er hetta eisini ein opin kapping, t.v.s. at øll, sum halda seg til, eru vælkomin at luttaka.
Cecil og Rigmor vunnu í fjør
Kappingina hjá monnunum í fjør vann Cecil Weihe við tíðini 1 t. 16 min. 55 sek., og hjá kvinnunum vann Rigmor N. Arge við 1 t. 29 min. 57 sek.
Í ár verður kappast í fleiri bólkum, menn, kvinnur, og eisini verður kapping fyri veteranar kvinnur og menn, tað eru tey, sum eru 45 ár ella eldri.
Tilmelding
Kappingin leygardagin byrjar kl. 14.00. Tilmelding er á staðnum hálvan tíma áðrenn startin.
Teinurin, sum skal rennast leygardagin, er á sløttum, so møguleikarnir eru góðir hjá rennarunum at fáa eina góða tíð.
