So var Stórmót IR aftur her. Stóra innandurakappingin, sum IR úr Reykjavík skipar fyri, og sum føroysku feløgini nú í fleiri ár hava havt sum fast mál at fara til. Í 2007 fór FÍF við einum fýramannahópi til hesa kapping. Fram til 2010 var ungdómslandsliðið við í hesi kapping, men síðani tá hava Hvirlan, Bragdið og Treysti hvør í sínum lagi vælfartað til hesa størstu innandurakapping í Íslandi.
Og í ár eru omanfyri 55 luttakarar við í kappingunum. Bragdið hevur 27, Hvirlan hevur 16 og Treysti hevur 13 luttakarar við. Harumframt eru eisini venjarar, leiðarar og fleiri foreldur við, so alt í alt eru umleið 80 farin vestur um í sambandi við Stórmót IR.
Ferðaliðið hjá Bragdinum avmyndað seinnapartin í dag, tá tey komu uppá pláss á vallaraheiminum í Laugardalinum. (mynd: Bragdið)
Fyrstu kappingarnar við føroyskari luttøku verða klokkan 10.20 leygarmorgunin, og so verður hildið til langt út á seinnapartin. Sunnumorgunin halda kappingarnar fram, og enda so seinnapartin sunnudagin.
Formaður FÍF’s er eisini við í Íslandi, og fer at kunna so frægt, sum til ber. Antin her, ella umvegis facebook-síðuna hjá FÍF.
Hópurin hjá Treysti avmyndaður seinnapartin. Tey hava verið her alla vikuna, og hava havt venjingar hvønn dag í stásiligu høllini í Hafnafirði. (mynd: Treysti)
Spentar Hvirlugentur við viðførisbandið í Keflavík
Vit hava tíverri enn onga mynda av hópinum hjá Hvirluni, men hon man fara at koma seinni.
FÍF ynskir øllum føroyingunum bestu eydnu komandi dagarnar.
Her var so felagsmyndin hjá Hvirluni
You must be logged in to post a comment.